Students in lecture hall some with hands up

Cwestiynau Cyffredin

Beth yw'r Arolwg Cenedlaethol o Fyfyrwyr (NSS)?

Mae’r NSS yn gyfrifiad blynyddol proffil uchel o bron hanner miliwn o fyfyrwyr ledled y DU. Mae’n arolwg sefydledig wedi’i gynnal bob blwyddyn ers 2005, ac mae’n llunio data defnyddiol i helpu prifysgolion, colegau ac undebau myfyrwyr (cymdeithasau neu urddau) i nodi beth maent yn ei wneud yn dda, a beth sydd angen ei wella. Mae’n rhoi llais pwerus i fyfyrwyr i helpu i lywio dyfodol eu cwrs. Mae hefyd yn darparu gwybodaeth ddefnyddiol i ddarpar fyfyrwyr sy’n penderfynu beth i’w astudio ac ymhle.

Mae’r arolwg yn casglu adborth gan fyfyrwyr cymwys, y bydd y rhan fwyaf ohonynt ar ddiwedd eu hastudiaethau. Gofynnir iddynt ymateb i 27 o gwestiynau dewis sengl sy’n ymwneud ag amryw agweddau ar eu cwrs.

Mae’r arolwg yn rhedeg ar draws pob darparwr addysg uwch a ariennir yn gyhoeddus yng Nghymru, Lloegr, Gogledd Iwerddon a’r Alban. Yn ogystal, mae colegau addysg bellach yn Lloegr a Gogledd Iwerddon, a sefydliadau addysg bellach (SABau) yng Nghymru sydd â myfyrwyr addysg uwch a ariennir yn uniongyrchol, yn gymwys i gymryd rhan.

Mae’n orfodol i brifysgolion a cholegau gymryd rhan yn yr NSS pan fo’r canlynol yn berthnasol:

  • Yn Lloegr, bydd disgwyl i bob darparwr (sefydliadau addysg uwch a cholegau addysg bellach) sydd wedi’i gofrestru a’i reoleiddio gan y Swyddfa Fyfyrwyr (OfS) gymryd rhan yn yr NSS fel rhan o’i amodau cofrestru parhaus.
  • Yng Ngogledd Iwerddon, mae cymryd rhan yn yr NSS yn amod ar gyfer derbyn arian fel y nodir yn y memoranda ariannol rhwng prifysgolion ac Adran yr Economi (Gogledd Iwerddon). Mae colegau addysg bellach yng Ngogledd Iwerddon yn cymryd rhan yn yr NSS er mwyn bodloni gofynion y Model Gweithredu Diwygiedig ar gyfer Sicrwydd Ansawdd.
  • Yn yr Alban, mae cyfranogiad darparwyr addysg uwch yn amod ar gyfer derbyn arian gan Gyngor Cyllido’r Alban.
  • Yng Nghymru, mae disgwyl i bob darparwr a reoleiddir gan Gyngor Cyllido Addysg Uwch Cymru (CCAUC) ac a ariennir gan CCAUC gymryd rhan yn yr NSS er mwyn sicrhau bod safbwyntiau’r corff amrywiol o fyfyrwyr yn cael eu cynrychioli, yn unol â’i gyfrifoldeb statudol i helpu i ddiogelu rhag gwahaniaethu ac i hyrwyddo cydraddoldeb, ac mae’r canlyniadau yn llywio cyfrifoldebau rheoleiddio CCAUC.

Cynhelir yr NSS am bedwar prif reswm:

  1. I lywio penderfyniadau myfyrwyr – mae’n galluogi darpar fyfyrwyr i gymharu cyrsiau mewn gwahanol brifysgolion a cholegau wrth benderfynu am beth i’w astudio ac ymhle.
  2. I ddarparu gwybodaeth er mwyn gwella profiad myfyrwyr – mae prifysgolion a cholegau’n defnyddio’r canlyniadau i helpu i wella eu cyrsiau, eu cyfleusterau a phrofiad dysgu’r myfyrwyr ar gyfer myfyrwyr y presennol a’r dyfodol.
  3. I gynorthwyo â sicrhau ansawdd a’r dirwedd reoliadol ehangach ym maes addysg uwch y DU.
  4. I roi sicrwydd cyhoeddus – mae’r arolwg hefyd yn fecanwaith i ddarparu gwybodaeth i’r cyhoedd am ansawdd addysg uwch yn y DU.

Mae eich adborth yn rhoi darlun i brifysgolion a cholegau o sut beth oedd y profiad dysgu i’r myfyrwyr sy’n gorffen eu cyrsiau yn 2022. Gall prifysgolion, colegau ac undebau myfyrwyr (cymdeithasau neu urddau) ddefnyddio’r data dienw i nodi beth maent yn ei wneud yn dda a beth sydd angen ei wella, i helpu i gyflawni newidiadau a fydd yn gwella’r profiad cyffredinol i fyfyrwyr. Yn ehangach, mae’r NSS yn rhoi gwybodaeth bwysig i’r pedwar rheoleiddiwr addysg uwch yn y DU ynglŷn ag ansawdd addysg uwch ledled y DU.

Caiff data o’r NSS ei gyhoeddi ar wefan Darganfod Prifysgol. Gall darpar fyfyrwyr ddefnyddio Darganfod Prifysgol i gymharu canlyniadau NSS ar draws gwahanol gyrsiau addysg uwch i’w helpu i wneud dewis gwybodus am beth i astudio ac ymhle.

Mae’r Swyddfa Fyfyrwyr (OfS) yn cyhoeddi canlyniadau ar ei gwefan y gellir eu lawrlwytho. Ond ni chaiff sylwadau agored dienw eu cyhoeddi a chânt ond eu gweld gan eich prifysgol neu eich coleg.

Gweler yr adran ‘Canlyniadau’ am fwy o wybodaeth am gyhoeddi canlyniadau yn 2022.

Caiff yr NSS ei gynnal gan Ipsos MORI a’i gomisiynu gan y Swyddfa Fyfyrwyr (OfS), ar ran cyrff cyllido a rheoleiddio’r DU – Cyngor Cyllido Addysg Uwch Cymru (CCAUC), Cyngor Cyllido’r Alban (SFC), ac Adran yr Economi Gogledd Iwerddon (DfENI).

Mathau o gwestiynau a ofynnir

Cwestiynau craidd

Mae’r arolwg yn gofyn i fyfyrwyr blwyddyn olaf roi adborth ar eu cyrsiau. Mae 27 o gwestiynau craidd, sy’n ymwneud â’r agweddau canlynol ar brofiad y myfyrwyr:

  • Yr addysgu ar fy nghwrs
  • Cyfleoedd dysgu
  • Asesu ac adborth
  • Cymorth academaidd
  • Trefniadau a rheoli
  • Adnoddau dysgu
  • Y gymuned ddysgu
  • Llais y myfyriwr
  • Boddhad cyffredinol

Yn ogystal, gellid gofyn cwestiynau am eu lleoliadau i fyfyrwyr sy’n astudio cyrsiau pynciau’r GIG.

Sylwadau agored

Rhoddir cyfle i fyfyrwyr hefyd ddarparu sylwadau cadarnhaol a/neu negyddol am eu profiad yn gyffredinol yn eu prifysgol neu goleg. Caiff sylwadau eu hanfon ymlaen yn ddienw i’r brifysgol a cholegau er mwyn eu helpu i weld ble mae’r cryfderau a hefyd sut gallant wneud gwelliannau.

Noder bod y cwestiynau penagored yn ddewisol ac mae uchafswm geiriau o 4,000 o nodau. Gallwch hefyd ddewis anfon sylwadau ychwanegol dros neges e-bost at Ipsos MORI drwy thestudentsurvey@ipsos.com.

Er mwyn cadw eich hun ac eraill yn ddienw, gofynnir i chi beidio â gwneud sylwadau:

  • a fyddai’n galluogi eich adnabod fel unigolyn;
  • sy’n enwi unigolion; neu
  • sy’n cyfeirio at bethau a fyddai’n galluogi adnabod unigolyn arall, e.e. arweinydd cwrs neu bennaeth adran.

Holiadur yr Arolwg Cenedlaethol o Fyfyrwyr

Cwestiynau dewisol

Caiff prifysgolion a cholegau ddewis hyd at chwe chronfa o gwestiynau dewisol a chynnwys hyd at ddau gwestiwn ychwanegol sy’n benodol iddyn nhw. Gofynnir iddynt gytuno gydag undebau myfyrwyr ar eu dewis o gronfeydd cwestiynau dewisol i’w cynnwys.

Atodir y cwestiynau hyn wrth y 27 cwestiwn craidd. Dim ond ar ôl i chi gwblhau’r holiadur craidd ar-lein y gofynnir y cwestiynau ychwanegol hyn i chi. Nid oes rhaid i chi gwblhau’r cwestiynau hyn, ac os ydych yn gwrthod gwneud, bydd eich atebion ar gyfer y cwestiynau craidd i’r NSS yn dal i gael eu cyflwyno. Caiff yr atebion i’r cwestiynau hyn eu darparu i’ch prifysgol neu goleg yn unig ac ni chânt eu rhyddhau i’r cyhoedd.

Gellir dod o hyd i’r holiadur NSS yma.

Caiff prifysgolion a cholegau ddewis hyd at chwe chronfa o gwestiynau dewisol a chynnwys hyd at ddau gwestiwn ychwanegol sy’n benodol i’w myfyrwyr. Gofynnir iddynt gytuno gydag undebau myfyrwyr ar eu dewis o gronfeydd cwestiynau dewisol i’w cynnwys. Gofynnir y cwestiynau ychwanegol os ydych yn cwblhau’r arolwg ar-lein yn unig, a dylai’r cwestiynau gymryd ond ychydig o funudau i’w cwblhau. Gofynnir i chi a hoffech barhau gyda’r cwestiynau ychwanegol hyn wedi i chi gwblhau cwestiynau craidd yr NSS. Os ydych yn dewis peidio â chwblhau’r cwestiynau ychwanegol, bydd eich ymatebion i’r prif arolwg yn dal i gael eu cyflwyno.

Mae myfyrwyr sy’n astudio cyrsiau pynciau’r GIG yn gwneud lleoliadau ymarfer, felly mae eu profiad o addysg uwch ychydig yn wahanol. Ar ben y 27 cwestiwn craidd, gofynnir cwestiynau ychwanegol am eu profiad yn eu lleoliadau ymarfer i fyfyrwyr sy’n astudio cyrsiau pynciau’r GIG.

Gofynnir yr un 27 cwestiwn craidd i bob myfyriwr, ond gallai rhai prifysgolion neu golegau ychwanegu cwestiynau ychwanegol ac mae myfyrwyr ar gyrsiau pynciau’r GIG hefyd yn cael cwestiynau ychwanegol.

Rydym hefyd yn cynnal arolwg peilot ac efallai y cewch eich gwahodd i gymryd rhan ar ôl i chi gwblhau’r NSS. Mae cymryd rhan yn wirfoddol.

Ymateb i’r NSS [ar gyfer myfyrwyr]

Chi a’ch cynfyfyrwyr yn unig sy’n gwybod sut beth oedd astudio ar eich cwrs ac felly mae’r NSS wedi’i lunio er mwyn casglu barn myfyrwyr ar y meysydd sydd o bwys i chi. Bydd eich prifysgol neu eich coleg yn defnyddio eich adborth i gyflawni newid go iawn i brofiad y myfyriwr.

Bydd eich ymateb i’r NSS hefyd yn helpu i roi gwybodaeth ddefnyddiol i ddarpar fyfyrwyr am eich cwrs. Caiff y canlyniadau eu rhyddhau i’r cyhoedd drwy wefan Darganfod Prifysgol. Gall darpar fyfyrwyr ddefnyddio Darganfod Prifysgol i gymharu canlyniadau’r NSS ar draws gwahanol gyrsiau addysg uwch i’w helpu i wneud dewisiadau gwybodus ynglŷn â beth i’w astudio ac ymhle.

Er mwyn sicrhau uniondeb data’r NSS, caiff prifysgolion a cholegau eu llywio ar sut maent yn hyrwyddo’r NSS, gan gynnwys beth a ystyrir yn dylanwadu’n amhriodol a sut i’w osgoi wrth annog myfyrwyr i gymryd rhan. Dylai’r NSS adlewyrchu beth rydych yn ei feddwl am eich cwrs ac felly mae’n bwysig nad yw eich prifysgol neu eich coleg yn gwneud unrhyw beth a allai ddylanwadu ar eich ymateb. Tra gallai prifysgolion a cholegau benderfynu hyrwyddo’r arolwg ac atgoffa myfyrwyr i gwblhau’r NSS, ni chânt annog myfyrwyr i adlewyrchu unrhyw beth oni bai am eu gwir farn am eu profiadau yn eu hatebion.

Mae yna ganllaw i fyfyrwyr ar ddylanwadu’n amhriodol i helpu a chynorthwyo myfyrwyr os ydynt yn teimlo y dylanwadir arnynt ynglŷn â sut i ymateb i’r arolwg. Mae’r canllaw hwn yn manylu ar beth allai olygu dylanwadu’n amhriodol a’r mathau o hyrwyddo mae prifysgolion a cholegau yn cael eu cynnal, neu beidio. Mae hefyd yn dweud wrthych sut i adrodd pryderon, y prosesau sydd ar waith i ymchwilio i honiadau o ddylanwadu’n amhriodol, a beth sy’n digwydd pe bai rhywun yn torri’r canllawiau. Os ydych yn meddwl bod eich prifysgol neu eich coleg yn dylanwadu ar ymatebion myfyrwyr i’r NSS yn amhriodol, anfonwch e-bost at NSSallegations@officeforstudents.org.uk.

Dim ond rhyw ddeng munud sydd ei angen i ateb y cwestiynau craidd yn yr NSS.

Efallai bydd eich prifysgol neu eich coleg yn dewis cynnwys ychydig o gwestiynau ychwanegol i gwestiynau craidd yr NSS, ond nid oes rhaid i chi ymateb i’r rhain os yw’n well gennych beidio â gwneud hynny.

Bydd Ipsos MORI yn cysylltu â chi dros e-bost i ddechrau i’ch gwahodd i gymryd rhan. Bydd yr e-bost hwn yn cynnwys dolen bersonol i’r arolwg a bydd yn eich tywys i’r arolwg, lle bydd gofyn i chi gadarnhau eich manylion personol i sicrhau eich bod yn gymwys i gymryd rhan yn yr arolwg. Os nad yw eich gwybodaeth bersonol yn gywir, mae’n bosibl y bydd angen i ni gysylltu â chi i gadarnhau eich ymateb. Gallwch hefyd gymryd rhan yn yr arolwg yn uniongyrchol drwy wefan yr arolwg.

Os byddwch yn gymwys, caiff eich atebion eu cynnwys yn yr arolwg. Unwaith y byddwch wedi ateb cwestiynau’r arolwg, ni fydd Ipsos MORI yn cysylltu â chi nac yn eich atgoffa mwyach ynglŷn â’r arolwg NSS.

I ddechrau, byddwn yn ceisio cysylltu â chi drwy e-bost, ac os na chawn ymateb, yna byddwn yn cysylltu â chi dros y ffôn. Mae’r arolwg wedi’i gysylltu â chronfa ddata fyw o fyfyrwyr cymwys, ac mae’r gronfa ddata yn cael ei diweddaru bob dydd er mwyn sicrhau nad yw myfyrwyr sydd eisoes wedi cwblhau’r NSS yn derbyn mwy o wahoddiadau. Os byddwch wedi cwblhau’r arolwg ond yn dal i gael gwahoddiad neu neges atgoffa, gallai hynny fod yn sgil ein hanallu i gyfateb y manylion a roddwyd gennych i’r manylion a roddwyd gan eich prifysgol neu eich coleg. Hefyd, mae’n bosibl y bydd rhywfaint o orgyffwrdd o ran pryd yr anfonwyd eich ymateb a phryd y cysylltwyd â chi eto.

Os na allwch gael hyd i’r arolwg, fe’ch cynghorem i wirio’r wybodaeth ddilysu a roddwyd gennych. Gallwch wirio eich bod yn gymwys drwy ddarllen yr adran Cymhwystra a Chyfranogiad isod, y dudalen Cymhwystra, neu gan ddefnyddio’r gweithrediad gwirio cymhwystra yma. Gallwch gysylltu â ni hefyd drwy: thestudentsurvey@ipsos.com.

Os ydych wedi derbyn nodyn atgoffa oddi wrth Ipsos MORI wedi ichi gwblhau’r arolwg, mae tri rheswm posibl dros hyn:

  1. Nid ydym wedi cael eich arolwg gorffenedig. Mae’n bosibl nad ydych wedi cwblhau eich ymateb yn llawn a’i gyflwyno. Os felly, gofynnwn ichi gwblhau’r arolwg yn llawn unwaith eto.
  2. Nid oedd eich manylion yn cyfateb â’r manylion yn ein cronfa ddata (sy’n cynnwys yr holl fyfyrwyr sy’n gymwys i gymryd rhan) er mwyn dilysu eich ymateb. Mae’n rhaid i ni fod yn sicr mai chi a anfonodd yr ymateb rydym wedi ei dderbyn er mwyn ei ddilysu. Cwblhewch yr arolwg eto a rhowch wybodaeth adnabod gywir er mwyn i ni allu dilysu eich ymateb.
  3. Roedd y cyfnod rhwng cyflwyno eich ymateb a diweddaru ein cronfa ddata yn gorgyffwrdd. Byddwn yn diweddaru ein cronfa ddata bob dydd drwy gydol cyfnod yr arolwg er mwyn lleihau’r siawns o hyn yn digwydd, ond gall hyn ddigwydd weithiau i rai ymatebwyr. Cysylltwch â thestudentsurvey@ipsos.com i wirio a ydym wedi cofnodi eich ymateb gorffenedig.

Unwaith y byddwch wedi cwblhau’r NSS ac mae’ch ymateb wedi cael ei ddilysu, ni ddylech dderbyn rhagor o ohebiaeth oddi wrth Ipsos MORI.

Sylwer y gallech gael nodyn atgoffa gan eich prifysgol neu eich coleg am yr arolwg, hyd yn oed os ydych wedi cwblhau’r arolwg. Gallai hyn ddigwydd oherwydd, er mwyn cynnal anhysbysrwydd, nid ydym yn rhoi manylion y myfyrwyr sydd wedi cwblhau’r arolwg neu beidio. Golyga hyn na all eich prifysgol neu eich coleg dargedu eu negeseuon e-bost at fyfyrwyr sydd heb ymateb eto.

Os ydych yn parhau i gael negeseuon atgoffa gan Ipsos MORI ac rydych yn credu bod gwall, cysylltwch ag Ipsos MORI drwy: thestudentsurvey@ipsos.com.

Cymhwystra a Chyfranogiad

Gofynnir i’r holl fyfyrwyr sy’n astudio ar gyrsiau sy’n arwain at gredydau neu gymwysterau israddedig ac sy’n hirach nag un flwyddyn o astudio amser llawn neu’r hyn sy’n gyfwerth ar gwrs rhan-amser (fel graddau baglor, graddau sylfaen, Diplomâu Addysg Uwch) wneud yr arolwg yn eu blwyddyn olaf.

Bydd myfyrwyr sy’n dilyn rhaglenni rhan-amser mwy hyblyg (na ellir rhagweld yn hawdd pryd y byddant ar eu blwyddyn olaf) yn cymryd rhan fel arfer yn ystod eu pedwaredd flwyddyn o astudio. Noder y bydd myfyrwyr sydd wedi rhoi’r gorau i’w hastudiaethau yn ystod eu blwyddyn olaf yn cael eu cynnwys yn yr arolwg gan fod eu hadborth yr un mor werthfawr. Oni bai y nodir yn wahanol, bydd myfyrwyr sydd wedi ailadrodd blwyddyn neu sydd wedi newid trefniadau eu cwrs, ond yr oedd disgwyl iddynt raddio yn 2022 yn wreiddiol, yn cael eu harolygu yn y flwyddyn gyfredol o hyd. Ni fydd myfyrwyr a dderbyniwyd arolwg yn 2021 yn cael un yn 2022.

I wirio a ydych yn gymwys i gwblhau’r arolwg neu beidio, cliciwch yma.

Bydd Ipsos MORI yn cysylltu â chi dros e-bost i ddechrau i’ch gwahodd i gymryd rhan. Bydd yr e-bost hwn yn cynnwys dolen bersonol i’r arolwg a bydd yn eich tywys i’r arolwg, lle bydd gofyn i chi gadarnhau eich manylion personol i sicrhau eich bod yn gymwys i gymryd rhan yn yr arolwg. Os nad yw eich gwybodaeth bersonol yn gywir, mae’n bosibl y bydd angen i ni gysylltu â chi i gadarnhau eich ymateb. Gallwch hefyd gymryd rhan yn yr arolwg yn uniongyrchol drwy wefan yr arolwg.

Os byddwch yn gymwys, caiff eich atebion eu cynnwys yn yr arolwg. Unwaith y byddwch wedi ateb cwestiynau’r arolwg, ni fydd Ipsos MORI yn cysylltu â chi nac yn eich atgoffa mwyach ynglŷn â’r arolwg NSS.

I ddechrau, byddwn yn ceisio cysylltu â chi drwy e-bost, ac os na chawn ymateb, yna byddwn yn cysylltu â chi dros y ffôn. Mae’r arolwg wedi’i gysylltu â chronfa ddata fyw o fyfyrwyr cymwys, ac mae’r gronfa ddata yn cael ei diweddaru bob dydd er mwyn sicrhau nad yw myfyrwyr sydd eisoes wedi cwblhau’r NSS yn derbyn mwy o wahoddiadau. Os byddwch wedi cwblhau’r arolwg ond yn dal i gael gwahoddiad neu neges atgoffa, gallai hynny fod yn sgil ein hanallu i gyfateb y manylion a roddwyd gennych i’r manylion a roddwyd gan eich prifysgol neu eich coleg. Hefyd, mae’n bosibl y bydd rhywfaint o orgyffwrdd o ran pryd yr anfonwyd eich ymateb a phryd y cysylltwyd â chi eto.

Gallai rhai myfyrwyr nad ydynt yn eu blwyddyn olaf fod yn gymwys i gwblhau’r NSS. Os ydy Ipsos MORI wedi cysylltu â chi i gymryd rhan yn yr arolwg, rydych yn gymwys ac mae eich adborth yn cael ei werthfawrogi.

Er mwyn gwirio eich cymhwystra, anfonwch e-bost at thestudentsurvey@ipsos.com.

Os yw Ipsos MORI wedi cysylltu â chi i gwblhau’r arolwg eleni, yna rydych yn gymwys ac mae eich adborth yn cael ei werthfawrogi. Ystyrir yr holl fyfyrwyr y cysylltwyd â nhw eleni yn gymwys, beth bynnag oedd eu sefyllfa yn y flwyddyn flaenorol. Mae’n bosibl eich bod wedi gwneud yr arolwg y llynedd oherwydd gwall, neu roeddech wedi gwneud yr arolwg mewn perthynas â chwrs arall.

Bydd ymatebion i’r arolwg yn cael eu cadw’n gwbl gyfrinachol, ac mae’r holl ymatebion yn ddienw erbyn iddynt fod ar gael i’r brifysgol neu goleg er mwyn sicrhau na fydd unigolion yn cael eu hadnabod.

Siaradwch â prif gyswllt yr NSS yn eich prifysgol neu eich coleg, a fydd yn gallu gwirio’r rhestr o fyfyrwyr cymwys, a chysylltwch â ni drwy’r sianeli priodol.

Peidiwch ag anfon unrhyw wybodaeth am unigolyn ar e-bost i fewnflwch yr NSS; dim ond trwy allrwyd yr NSS, sydd wedi’i hamddiffyn â chyfrinair, y dylid trosglwyddo data am unigolyn drwy gyswllt NSS y brifysgol neu goleg.

Canlyniadau

Gellir lawrlwytho canlyniadau’r NSS o wefan y Swyddfa Fyfyrwyr (OfS), ond mae unrhyw sylwadau rydych yn eu gwneud yn ddienw ac ni chânt eu cyhoeddi, a dim ond eich prifysgol neu eich coleg y gellir eu gweld. Dim ond data sy’n cydymffurfio â throthwyon cyhoeddi’r NSS (o leiaf deg ymateb myfyrwyr a chyfradd ymateb cyffredinol o 50 y cant) fydd yn cael eu rhyddhau i’r cyhoedd. Os nad oes data yn cael ei ryddhau ar gyfer cwrs penodol lle cwblhaodd myfyrwyr arolwg, golyga hyn nad oedd y data yn bodloni’r trothwy cyhoeddi hwn. Nid yw diffyg data cyhoeddadwy yn adlewyrchu ansawdd cwrs neu brifysgol neu goleg.

Bydd canlyniadau manwl yn cael eu darparu i brifysgolion a cholegau unigol drwy borth dosbarthu a ddarperir gan Texuna Technologies Ltd. Caiff y canlyniadau hyn eu defnyddio gan brifysgolion a cholegau er mwyn canfod beth sy’n mynd yn dda, lle y gellir gwneud gwelliannau, ac i wella’r profiad dysgu yn gyffredinol ar gyfer myfyrwyr y presennol a’r dyfodol.

Mae canlyniadau’r NSS hefyd yn cael eu cyhoeddi hefyd ar lefel cwrs ar wefan Darganfod Prifysgol, sydd wedi’i ddylunio i helpu darpar myfyrwyr i wneud y penderfyniad pwysig o beth i’w astudio mewn addysg uwch ac ymhle.

Mae’r Fframwaith Rhagoriaeth Addysgu a Chanlyniadau Myfyrwyr (TEF) yn ymarfer a gyflwynwyd gan y llywodraeth yn Lloegr yn 2016 gyda, hyd yn hyn, cyfranogiad gwirfoddol gan ddarparwyr yn y DU.

Digwyddodd yr ymarferion TEF cychwynnol rhwng 2017 a 2019 a gwnaethant asesu:

  • Rhagoriaeth addysgu mewn prifysgolion a cholegau a
  • Pha mor dda yr oedd prifysgolion a cholegau yn sicrhau canlyniadau rhagorol ar gyfer eu myfyrwyr o ran cyflogaeth lefel graddedigion neu astudiaeth bellach.

Penderfynwyd ar wobrau TEF gan banel o academyddion, myfyrwyr ac arbenigwyr eraill gan ddefnyddio ystod o dystiolaeth, gan gynnwys setiau data swyddogol a gwybodaeth a gyflwynwyd gan y darparwr. Roedd hyn yn cynnwys data’r NSS, a ddefnyddiwyd i ddeall safbwyntiau myfyrwyr ar eu profiad dysgu. Digwyddodd yr ymarfer TEF diwethaf yn 2019, felly ers hynny nid yw data’r NSS wedi’i ddefnyddio at ddibenion TEF.

Mae’r Swyddfa Fyfyrwyr yn datblygu cynigion am fframwaith TEF newydd, gan gynnwys y defnydd o ddata’r NSS yn y dyfodol yn yr ymarfer, ac mae am ymgynghori ar y rhain yn hydref 2021, yr un pryd ag ymgynghori ar reoleiddio deilliannau myfyrwyr.

Nod y Swyddfa Fyfyrwyr (OfS) ar hyn o bryd yw cyhoeddi gwobrau TEF newydd yn gynnar yn 2023. Gan y gwnaed y gwobrau TEF presennol sawl blwyddyn yn ôl, mae’n bosibl nad ydynt yn rhoi adlewyrchiad cyfredol o ansawdd addysgu, felly mae’r Swyddfa Fyfyrwyr wedi cynghori prifysgolion a cholegau i beidio hysbysebu eu gwobrau.

Gallwch ddod o hyd i fwy o wybodaeth am y TEF ar wefan y Swyddfa Fyfyrwyr (OfS).

Astudiaeth feintiol yw’r NSS yn bennaf a dadansoddir y canlyniadau ar lefel gyfanredol. Caiff eich sylwadau eu troi’n ddienw a chaiff enwau unigolion eu dileu. Nid ymdrin â phryderon ymatebwyr ar lefel bersonol ac unigol yw bwriad y data. Os oes gennych bryderon am eich iechyd a lles eich hun neu rai eraill, dylech godi hyn gyda’ch gwasanaethau llesiant yn eich prifysgol neu eich coleg, gan y bydd hyn yn rhoi’r ymateb cyflymaf.

Dylanwadu’n amhriodol a hyrwyddo’r arolwg

Gall ‘dylanwadu’n amhriodol’ olygu:

‘Unrhyw weithgaredd a allai annog myfyrwyr i adlewyrchu unrhyw beth ac eithrio eu gwir farn o’u profiadau yn ystod eu cwrs yn eu hymatebion i’r NSS’.

Gall y math hwn o ‘ddylanwadu’n amhriodol’ ddigwydd drwy:

  • e-bost
  • sesiynau wyneb yn wyneb a darlithoedd
  • posteri, deunyddiau a gweithgareddau
  • cyfathrebu rhwng myfyrwyr
  • cyfathrebu gan sefydliadau myfyrwyr, megis eich undeb y myfyrwyr.

Er mwyn i’r NSS fod yn ddefnyddiol, mae angen i gymaint o fyfyrwyr cymwys â phosibl gymryd rhan. Mae hyn yn golygu ei fod yn bwysig hyrwyddo’r arolwg.

Mae Ipsos MORI yn rhedeg ymgyrch cyhoeddusrwydd cenedlaethol. Anogir prifysgolion a cholegau hefyd i redeg eu hymgyrchoedd eu hunain gyda’u myfyrwyr a’u staff.

Gallant ddewis gwneud hyn mewn gwahanol ffyrdd:

  • hyrwyddo ar y cyfryngau cymdeithasol
  • gosod posteri o amgylch y campws
  • negeseuon e-bost i fyfyrwyr cymwys i’w gwahodd i gwblhau’r arolwg
  • ymgysylltu ag adrannau a staff addysgu i roi gwybodaeth am yr NSS drwy sôn mewn darlithoedd
  • ymgysylltu â chyrff a chynrychiolwyr myfyrwyr i roi gwybodaeth am yr NSS
  • defnyddio lotrïau gwobrau, cymhelliannau neu gystadlaethau i annog cwblhau.

Gall prifysgolion a cholegau atgoffa myfyrwyr i gwblhau’r NSS ac i fyfyrio ar beth rydych yn ei feddwl o’ch cwrs. Fodd bynnag, nid yw annog myfyrwyr i ymateb mewn ffordd nad yw’n adlewyrchu eu gwir safbwyntiau o’u profiad yn dderbyniol. Ni ddylai eich prifysgol neu eich coleg ddylanwadu ar eich ymateb.

Y mathau o weithgareddau hyrwyddo y gall prifysgolion a cholegau eu gwneud:

  • Cynnal ymgyrch niwtral sy’n canolbwyntio ar gynyddu ymatebion yn yr NSS yn unig.
  • Darparu enghreifftiau o le mae adborth blaenorol wedi dod â gwelliannau penodol yn y brifysgol neu goleg.
  • Annog myfyrwyr cymwys i gymryd rhan.
  • Caniatáu myfyrwyr i roi eu hadborth beth bynnag fo’u barn.
  • Byddwch yn ymwybodol o’r tôn a defnydd o iaith wrth drafod yr NSS – cadwch bethau’n niwtral.
  • Targedu gwaith hyrwyddo at adrannau neu gyrsiau sydd â chyfraddau ymateb isel.
  • Hysbysu’r myfyrwyr eu bod yn rhydd i ddehongli cwestiynau’r arolwg fel y mynnent – mae cwestiynau’r NSS yn hunaneglurhaol.
  • Cynnal sesiynau gwirfoddol ar gyfer cwblhau’r NSS.
  • Sicrhau bod y myfyrwyr yn cael cwblhau’r arolwg yn gwbl breifat.
  • Defnyddio cymhelliannau neu lotri wobrau i hyrwyddo’r arolwg.
  • Sicrhau bod yr holl staff yn ymwybodol o’r canllawiau.

Y mathau o weithgareddau hyrwyddo na all prifysgolion a cholegau eu gwneud:

  • Ymgorffori gweithgareddau marchnata’r NSS mewn gweithgareddau hyrwyddo ehangach, er enghraifft ymgyrchoedd ‘Pride’ ac ‘I Love’ – mae’n rhaid bod rhaniad clir.
  • Cyfuno’r NSS ag arolygon eraill sy’n cael eu cynnal yn y brifysgol neu goleg.
  • Cynghori myfyrwyr ar sut i ddehongli cwestiynau’r arolwg neu raddfa ymateb – dylech eu dehongli yn eich ffordd eich hun.
  • Cynghori neu ofyn i fyfyrwyr ymateb mewn ffordd benodol.
  • Gwneud cymryd rhan mewn lotri wobrau yn amodol ar gwblhau’r NSS.
  • Cysylltu’r NSS â thablau cynghrair neu’r Fframwaith Rhagoriaeth Addysgu a Chanlyniadau Myfyrwyr (TEF).
  • Rhagolygon swyddi a gwerth canfyddedig graddau myfyrwyr – dweud wrthych y gallai ymatebion negyddol i’r NSS wneud i’ch gradd edrych yn ddrwg i gyflogwyr yn y dyfodol.
  • Nodi bod yr arolwg yn orfodol.
  • Gorfodi neu roi pwysau ar fyfyrwyr i fynychu sesiynau penodol yr NSS.
  • Tywys myfyrwyr drwy’r arolwg ar sail unigol neu wneud yr arolwg gyda chi – dylech fod yn cael preifatrwydd i ymateb yn onest.
  • Cwblhau’r arolwg ar ran y myfyriwr.

Caiff unrhyw honiadau o geisiadau amhriodol i ddylanwadu ar ganlyniadau’r NSS eu hystyried gan gyrff cyllido a rheoliadol y DU i sicrhau bod uniondeb data’r NSS yn cael ei gynnal.

Os ydych yn meddwl bod eich prifysgol neu eich coleg yn dylanwadu’n amhriodol ar ymatebion myfyrwyr i’r NSS, anfonwch e-bost at NSSallegations@officeforstudents.org.uk. Mae’r Swyddfa Fyfyrwyr yn gyfrifol am reoli’r broses o ymchwilio i bryderon bod myfyrwyr wedi bod yn destun dylanwad amhriodol wrth gwblhau’r NSS.

Gellid codi pryderon ar unrhyw adeg, ond mae’n ddefnyddiol os cânt eu dwyn i’n sylw cyn gynted â phosibl, yn arbennig tra bo’r arolwg yn weithredol rhwng mis Ionawr ac Ebrill, fel y gellir cymryd camau amserol.

Bydd pob pryder gyda manylder digonol yn cael ei ystyried gan ddefnyddio’r gweithdrefnau ar gyfer ymchwilio i honiadau o ddylanwadu’n amhriodol ar ganlyniadau’r arolwg. Gellir dod o hyd i’r ddogfen hon ar wefan y Swyddfa Fyfyrwyr (OfS) o dan Promotion of the NSS.

Os canfu ymchwiliad fod gweithgareddau hyrwyddo wedi achosi dylanwadu’n amhriodol, p’un ai’n fwriadol neu’n anfwriadol, gellid cwestiynu uniondeb data’r NSS ac mae’n bosibl na fyddai’r Swyddfa Fyfyrwyr mewn partneriaeth â chyrff cyllido a rheoliadol y DU yn gallu cyhoeddi canlyniadau’r NSS ar gyfer y cyrsiau dan sylw yn y brifysgol neu goleg y flwyddyn honno.

Byddai hyn hefyd yn golygu na fyddai canlyniadau’r NSS ar gael i’w defnyddio mewn gweithgareddau marchnata, gwaith gwella dysgu neu ar gyfer eu cynnwys ar wefannau gyda gwybodaeth cymharu cyrsiau megis Darganfod Prifysgol a gwefan y Swyddfa Fyfyrwyr (OfS).

Preifatrwydd a Diogelu Data

Mae eich manylion cyswllt wedi cael eu darparu i Ipsos MORI gan eich prifysgol neu eich coleg o dan awdurdod y Swyddfa Fyfyrwyr (OfS) ac ar ran gweddill cyrff cyllido a rheoleiddio’r DU. Mae Ipsos MORI wedi’i gomisiynu i gynnal yr NSS a bydd ond yn defnyddio manylion y myfyrwyr at ddiben yr arolwg hwn yn unig. Ar ôl cwblhau’r prosiect yn haf 2022, bydd manylion pob myfyriwr yn cael eu dileu o systemau Ipsos MORI.

Mae Ipsos MORI yn aelod o’r Gymdeithas Ymchwil i’r Farchnad ac ymdrinnir â’r holl fanylion ac atebion gan gydymffurfio’n llawn â deddfwriaeth diogelu data.

Bydd eich atebion i’r arolwg yn cael eu cadw’n gwbl gyfrinachol, ac mae’r holl atebion yn ddienw erbyn iddynt fod ar gael i’ch prifysgol neu goleg. Cedwir yr holl atebion yn gyfrinachol ac eithrio mewn amgylchiadau arbennig pan fydd tystiolaeth bod yr ymatebydd neu eraill mewn perygl o niwed.

Defnyddir gwybodaeth mewn cydymffurfiaeth â’r Rheoliad Cyffredinol ar Ddiogelu Data (GDPR) a Deddf Diogelu Data 2018. Darllenwch y Datganiad Preifatrwydd llawn am fwy o fanylion.

Mae cymryd rhan yn yr NSS yn wirfoddol. Os nad ydych yn dymuno cymryd rhan, gallwch optio allan o’r arolwg.

Os bydd Ipsos MORI yn cysylltu â chi yn uniongyrchol unrhyw bryd (rhwng 6 Ionawr a 30 Ebrill), gallwch ddatgan nad ydych yn dymuno cymryd rhan ac ni fydd Ipsos MORI yn cysylltu â chi eto. Sylwer, mae’n rhaid i chi fynd ati i optio allan os nad ydych yn dymuno cymryd rhan yn yr arolwg – nid yw anwybyddu’r e-bost neu’r cyfweliad dros y ffôn yn fodd o optio allan.

Os oes dull cysylltu sy’n well gennych, cewch hefyd ddewis optio allan o gamau penodol o’r arolwg (e.e. yr arolwg ar-lein) trwy glicio ar y ddolen optio allan, neu cewch optio allan o bob cam trwy glicio yma.

Mae’n rhaid i ni fod yn sicr o fanylion adnabod y myfyriwr sy’n optio allan. Felly, gofynnwn am yr un wybodaeth adnabod a roddir gan y rheiny sy’n ymateb i’r arolwg.

Rydym yn derbyn sylwadau ychwanegol i’r cwestiynau agored. Os hoffech wneud unrhyw sylwadau ychwanegol, cysylltwch â ni drwy thestudentsurvey@ipsos.com. Er mwyn atodi sylwadau ychwanegol i’r atebion a gyflwynwyd gennych i’r arolwg, sylwch y byddwn yn gofyn am wybodaeth ddilysu gennych.

Mae hawl gennych hefyd i ofyn i’ch cofnod o’r arolwg/ymchwil gael ei ddileu’n gyfan gwbl neu’n rhannol. Ond yn sgil amserlenni cyhoeddi, dylech wneud unrhyw geisiadau i newid atebion erbyn 30 Ebrill 2022. Am fwy o wybodaeth, cysylltwch â ni ar thestudentsurvey@ipsos.com.

Hyrwyddo’r NSS [ar gyfer prifysgolion a cholegau yn unig]

Gall prifysgolion a cholegau atgoffa myfyrwyr i gwblhau’r NSS ac ystyried eu hymatebion yn ofalus. Fodd bynnag, nid yw annog myfyrwyr i ymateb mewn ffordd nad yw’n adlewyrchu eu barn ddidwyll am eu profiad yn dderbyniol. Ni ddylai staff roi cyfarwyddyd penodol i fyfyrwyr ar sut i gwblhau’r arolwg, fel esbonio ystyron cwestiynau neu raddfa’r NSS. Yn benodol, ni ddylid defnyddio holiadur yr NSS fel y caiff ei weinyddu gan Ipsos MORI ymhlith myfyrwyr cymwys yn yr un flwyddyn academaidd ag y byddant yn cael gwahoddiad i gymryd rhan yn yr arolwg gan Ipsos MORI. Ni ddylid sefydlu unrhyw gyswllt rhwng ymatebion yr NSS a thablau cynghrair, na gwerth ymddangosiadol graddau myfyrwyr.

Mae’n hollbwysig fod yr arolwg yn cael ei hyrwyddo mewn ffordd ddiduedd a:

  • Bod pob myfyriwr yn cael ei dargedu mewn ffordd gyfartal er mwyn i bob myfyriwr cymwys gael cyfle i fynegi ei farn ar ei brofiad;
  • Bod yn rhaid i fyfyrwyr deimlo’n rhydd i roi eu hadborth gonest ar eu profiadau heb i’w prifysgol neu goleg ddylanwadu ar eu hymatebion;
  • Na ddylai’r myfyrwyr orfod cwblhau’r arolwg tra bo aelod o staff yn ei arwain drwyddo neu’n goruchwylio ei ymatebion; ni ddylai myfyrwyr deimlo bod eu hymatebion yn cael eu monitro;
  • Na ddylid gorfodi myfyrwyr i gwblhau’r arolwg, na gwneud iddynt deimlo y bydd goblygiadau os na fyddant yn ei gwblhau; ac
  • Na ddylid annog myfyrwyr neu ofyn iddynt ymateb mewn ffordd nad yw’n adlewyrchu eu profiad, e.e. ni ellir dweud wrthynt am beidio â defnyddio ymateb niwtral ‘Ddim yn cytuno nac yn anghytuno’.

Bydd cyrff cyllido a rheoleiddio’r DU yn ystyried unrhyw honiadau o geisiadau amhriodol i ddylanwadu ar ganlyniadau’r NSS yn fater difrifol iawn. Mae hyn er mwyn sicrhau y caiff uniondeb data’r NSS ei gynnal. Mae canllawiau pellach hefyd ar gael yng Nghanllaw Arferion Da yr NSS.

Mae’r Swyddfa Fyfyrwyr (OfS) yn gyfrifol am reoli’r broses am bryderon bod myfyrwyr wedi bod yn destun dylanwad amhriodol wrth gwblhau’r NSS ar ran cyrff cyllido a rheoleiddio’r DU. Am fwy o wybodaeth am arferion da wrth hyrwyddo’r arolwg a sut i osgoi dylanwadu’n amhriodol, gweler canllaw arferion da yr NSS. Am fwy o wybodaeth am weithdrefnau ymchwilio i honiadau o ddylanwadu’n amhriodol ar ganlyniadau’r arolwg, gweler https://www.officeforstudents.org.uk/advice-and-guidance/student-information-and-data/national-student-survey-nss/promotion-of-the-nss/

Os oes unrhyw agwedd ar y canllawiau hyn nad ydych yn siŵr ohoni, cysylltwch â’r unigolyn sy’n gyfrifol am yr NSS yn eich prifysgol neu eich coleg, neu gallwch anfon e-bost atom yn uniongyrchol drwy’r llinell gymorth NSS a byddem yn hapus i roi mwy o gyngor neu eglurhad.

Staff prifysgol a choleg sydd yn aml yn y lle gorau i gyfathrebu buddion a phwysigrwydd yr arolwg. Gallant siarad yn uniongyrchol â myfyrwyr am sut fydd y canlyniadau yn cael eu defnyddio gan y rheini sy’n edrych i symud i addysg uwch a sut cânt eu defnyddio i wella profiad y myfyriwr yn y brifysgol neu goleg yn fwy cyffredinol. Mae’n hollbwysig fod staff prifysgolion a cholegau yn pwysleisio gwrthrychedd wrth drafod yr NSS oherwydd y ffordd y bydd y canlyniadau’n cael eu defnyddio gan ddarpar fyfyrwyr, prifysgolion/colegau, undebau myfyrwyr a rhanddeiliaid eraill.

 

Caiff prifysgolion a cholegau ddewis defnyddio eu canlyniadau NSS mewn deunyddiau marchnata i hyrwyddo cyrsiau penodol neu’r darparwr yn gyffredinol. Caniateir hyn, ond ceir nifer o gyfyngiadau sy’n ddibynnol ar y math o ddata a rennir a’i ansawdd.

Mae’n rhaid glynu wrth y trothwyon cyhoeddi (cyfradd ymateb o o leiaf 50% ac o leiaf deg o fyfyrwyr) ar bob lefel. Ni ddylid cyhoeddi unrhyw ganlyniadau sydd o dan y trothwy hwn.

Gellir defnyddio canlyniadau’r NSS o ddata a gyhoeddwyd mewn deunyddiau marchnata a’u priodoli i’r NSS, ar yr amod fod y trothwyon cyhoeddi a grybwyllir uchod wedi’u bodloni.

Gellir hefyd defnyddio canlyniadau’r NSS o ddata sydd heb eu cyhoeddi, fel cwestiynau cronfa dewisol neu gwestiynau sy’n benodol i ddarparwr, mewn deunyddiau marchnata, ond ni ellir priodoli’r rhain i’r NSS.  Fodd bynnag, ni ddylid defnyddio sylwadau testun rhydd mewn deunyddiau cyhoeddus er mwyn cadw myfyrwyr yn ddienw. Rhaid bodloni’r trothwyon cyhoeddi a grybwyllir uchod ar gyfer y garfan y bydd ei chanlyniadau’n cael eu cyhoeddi.

Mae canlyniadau’r NSS yn ddarostyngedig i’r datganiad preifatrwydd, sy’n nodi bod sylwadau testun agored dienw ond yn cael eu rhannu â’r brifysgol/coleg neu gorff cyllido neu reoleiddio perthnasol yn y DU. Ni all prifysgolion a cholegau ddyfynnu sylwadau testun agored mewn deunyddiau marchnata.

Fodd bynnag, gellir aralleirio sylwadau testun agored o holiadur craidd yr NSS mewn deunyddiau marchnata, ar yr amod nad yw’r testun yn adnabod unrhyw unigolion ac nad yw’r sylwadau’n cael eu priodoli i’r NSS.

Ni ellir defnyddio sylwadau testun agored o’r cwestiynau cronfa dewisol neu’r cwestiynau sy’n benodol i ddarparwr ar unrhyw ffurf.

Er mwyn cyhoeddi canlyniadau, mae angen bodloni trothwy o ddeg ymatebydd a chyfradd ymateb o 50 y cant yn gyffredinol ac yn ôl pwnc. Mae data’r NSS yn dal i fod yn offeryn pwysig o ran helpu darpar fyfyrwyr i wneud penderfyniadau am beth i’w astudio ac ymhle. Po fwyaf yw’r gyfradd ymateb, mwyaf yw’r tebygolrwydd y bydd data ar lefel cyrsiau ar gael yn gyhoeddus i’r myfyrwyr hyn.

Mae sawl ffordd o roi hwb i’r NSS o fewn eich pwnc/cwrs, gan gynnwys:

  • Atgoffa myfyrwyr blwyddyn olaf yn ystod darlithoedd
  • Trefnu sesiynau cyfrifiadur gwirfoddol
  • Ychwanegu erthyglau nodwedd am yr NSS i wefannau mewnrwyd / Moodle
  • Trafod yr NSS drwy wefannau cyfryngau cymdeithasol pynciau/cyrsiau
  • Anfon cyfathrebu dros e-bost wedi’i dargedu at fyfyrwyr cymwys
  • Cynnig lotrïau gwobrau mewnol i fyfyrwyr cymwys

Gellir cynnal sesiynau penodol ar unrhyw bryd yn ystod gwaith maes yr arolwg. Gall myfyrwyr fewngofnodi i www.thestudentsurvey.com a dewis yr opsiwn ‘Cymryd rhan yn yr Arolwg’. Mae’n rhaid i fyfyrwyr fynychu’r sesiynau hyn o’u gwirfodd. Gallech hefyd drefnu sesiynau i gyd-daro â’r adeg pan fydd eu gwahoddiadau e-bost wedi’u personoli yn cael eu hanfon.

  • Wythnos 1 yr arolwg: trefnu sesiynau penodol ar y dydd Gwener neu’r dydd Llun canlynol
  • Wythnos 2 yr arolwg: trefnu sesiynau penodol ar y dydd Mawrth neu’r dydd Mercher
  • Wythnos 3 yr arolwg: trefnu sesiynau penodol ar y dydd Llun

Gall anfon negeseuon e-bost wedi’u targedu sy’n gwahodd myfyrwyr i gwblhau’r arolwg yn www.thestudentsurvey.com/cy/ fod yn ddefnyddiol. Fodd bynnag, rydym yn argymell na ddylid anfon gormod o negeseuon atgoffa dros e-bost oherwydd gall hyn gael effaith negyddol. Sicrhewch eich bod yn cydlynu’r negeseuon e-bost hyn ag amserlen gwaith maes Ipsos MORI er mwyn sicrhau nad ydynt yn gorgyffwrdd â’n gweithgareddau. Dylai aelod o’r uwch-staff gytuno ar gynnwys yr e-bost. Ni ddylai unrhyw ddeunyddiau cyfathrebu a/neu ddeunyddiau marchnata darparwr geisio mewn unrhyw ffordd i ddylanwadu ar farn myfyrwyr (gweler canllaw arferion da yr NSS).

Cysylltwch â phrif gysylltiadau’r NSS yn eich prifysgol neu eich coleg er mwyn sicrhau y caiff negeseuon e-bost eu hanfon at fyfyrwyr cymwys yn unig.

Argymhellir ar gyfer prifysgolion a cholegau yn yr Alban, Cymru a Gogledd Iwerddon i arddangos deunyddiau hyrwyddo o amgylch eich prifysgol neu eich coleg cyn lansio’r arolwg ar 6 Ionawr 2022 (mae hyn yn ddewisol ar gyfer prifysgolion a cholegau yn Lloegr). Mae hyn er mwyn sicrhau ei fod yn weladwy i fyfyrwyr ac yn ffres yn eu meddyliau cyn iddynt gael eu gwahoddiadau e-bost. Bydd yr arolwg yn aros ar agor tan 30 Ebrill 2022. Parhewch i arddangos y deunyddiau tan y dyddiad hwn os gwelwch yn dda.

Cyswllt

Os oes gennych gwestiwn am yr Arolwg Cenedlaethol o Fyfyrwyr sydd heb ei ateb ar y wefan hon, yna anfonwch e-bost at un ai thestudentsurvey@ipsos.com, nss@officeforstudents.org.uk neu cliciwch yma am dudalen gyswllt Ipsos MORI.